ماهو الأكل الصحي وكيف تاكل أكل صحي ؟

موضوع الأكل الصحي فيه لخبطة كثيرة - ولو سويت بحث بسيط

راح تلقى ناس يقولون الحليب غير صحي وضار

وراح تلقى ناس يقولون لك الكربوهيدرات غير صحية والمفروض تتبع الكيتو عشان يكون اكلك صحي

وراح تلقى ناس نباتيين يقولون لك اللحوم ومنتجات الألبان بشكل عام غير صحية

وراح تلقى ناس يقولون لك لازم تاكل اكل عضوي 100% عشان تكون تغذيتك صحية

في النهاية اكيد راح تتلخبط وتتعقد لانه كل شي مو صحي وما تدري ايش تسوي وما الومك على هذا الشي

خلونا نتفق على نقطتين :

النقطة الأولى : الأكل الصحي له مستويات اكيد الأكل العضوي أفضل من الأكل العادي لكن هل هذا الشي يعني ان الاكل العادي غير صحي لا طبعاَ

النقطة الثانية : الأكل الصحي شخصي بحت - فالأكل الصحي بالنسبة لي ماراح يكون نفس الأكل الصحي بالنسبة لك

فعشان تتخلص من اللخبطه وتبدأ تاكل اكل صحي بشكل أكبر ابغاك تركز على تحسين جودة الأكل

بممارسة بسيطة الان ابغاك تبدأ تطبقها في نمط حياتك

ابغاك تقسم الأكل لثلاثة أقسام :

قسم أحمر ( قلل منه قد ما تقدر )

قسم أصفر ( يعتبر متوسط )

قسم أخضر ( هذا أفضل أكل لك )

1:القسم الأحمر : اكل ضعيف في القيمة الغذائيه - أكل يخليك تحس بإحساس غير مريح- مثل الإنتفاخات والتخمة الخ- اكل ممكن تتحسس منه وبرضه ما تقدر تتحكم في الكميات معاه وتحس انك تدمنه بسرعه

بالنسبة لي هذي القائمه فيها الكيك والنوتيلا والشيبس بأنواعه

2:القسم الأصفر : ( أكل أوقات يكون جيد وأوقات لا - يعني وسط لا كذا ولا كذا - اذا اكلت منه كمية قليلة يكون عادي- متوسط القيمة الغذائية )

مثلاَ الخبز الأبيض بالنسبة ليه احطه في هذه القائمة - الحليب احطه في هذه القائمة

3:القسم الأخضر : أكل يخليك مرتااااح وتحسس أنه مفيد لك ومغذي لك وقيمته الغذائيه عاليه ويشبعك بشكل كافي - اكل يخلي جهازك الهضمي مرتاح - هذا الأكل اللي تحتاج تركز عليه وتقدر تاكله ببطئ وتتحكم في الكمية براحة وما تكون مدمن عليه

بالنسبة لي في هذه القائمه احط ( الدجاج-السمك - اللحم - الخبز البر كامل القمح - الأرز الأسمر -الخضروات والفواكه )

فكل شخص عنده " اكل صحي " مختلف عن الآخر

اذا كان الحليب يسبب لك مشاكل في الجهاز الهضمي هنا تحطه في القائمه الحمراء لكن شخص ثاني الحليب بالنسبة له في القائمة الخضراء وشخص ثالث الحليب بالنسبة له في القائمة الصفراء

وقبل ما انهي المدونة ابغى اعطيك هديه مجانيه كتيب الأكل ( الى الان ما قد سميته ) الكتيب هذا راح يكون فيه لستة من الاكلات محسوبة السعرات والعناصر الغذائية وراح احوله لكتاب طبخ مجانية مع الوقت - رابط الكتيب راح تلقاه أسفل المدونه